‘லியோ’ படத்தைத் தொடர்ந்து விஜய் நடிக்கும் படத்தை வெங்கட் பிரபு இயக்கி வருகிறார். விஜய்யின் 68வது படமான இதில் அப்பா மகன் என 2 வேடங்களில் அவர் நடிக்கிறார். ஜெயராம், பிரபுதேவா, மோகன், பிரஷாந்த், சினேகா, லைலா, மீனாட்சி சவுத்ரி உட்பட பலர் நடிக்கின்றனர். யுவன் சங்கர் ராஜா இசையமைக்கிறார். கங்கை அமரன், கார்க்கி, கபிலன் வைரமுத்து, அறிவு பாடல்கள் எழுதுகின்றனர். இந்தப் படத்தை ஏஜிஎஸ் நிறுவனம் தயாரிக்கிறது.
இந்நிலையில் இந்தப் படத்தின் முதல் தோற்ற போஸ்டர் மற்றும் டைட்டில் போஸ்டர் நேற்று மாலை வெளியாகும் என்று தயாரிப்பாளர் அர்ச்சனா கல்பாத்தி அறிவித்திருந்தார். அதன்படி நேற்று வெளியிடப்பட்டது. படத்துக்கு ‘தி கிரேட்டஸ்ட் ஆஃப் ஆல் டைம்’ (The Greatest Of All Time) என்று தலைப்பு வைத்துள்ளனர். இந்த போஸ்டரில் விமானிகள் உடையில் இரண்டு விஜய்யும் இருப்பது போல் வடிவமைக்கப்பட்டுள்ளது.
